ស្តេចសៀកស្រុកខ្មែរ លោកតា ចៅ ហ្វាទទួល មរណភាពក្នុងជន្មាយុ៩១ឆ្នាំ
រាជធានីភ្នំពេញ ៖ ស្តេចសៀកក្នុងស្រុកខ្មែរ លោក ចៅ ហ្វា បានទទួលមរណភាពហើយ នៅថ្ងៃទី៩ ខែតុលា ឆ្នាំ២០២៤ នេះ ក្នុងជន្មាយុ៩១ឆ្នាំ ដោយសារដាច់សរសៃឈាមក្នុងខួរក្បាល ខណៈពេលដែលលោកបានពើបប្រទះនូវជំងឺមួយចំនួនទៀត បូករួមនឹងភាពចាស់ជរាផងដែរ ។
យោងតាមការប្រកាសពីក្រុមដំណើរខ្មែរលើបណ្តាញសង្គមបានឲ្យដឹងថា លោកព្រឹទ្ធាចារ្យ ចៅ ហ្វា បិតាសៀករហ័សសកម្មខ្មែរ និងជាផលិតករខ្សែភាពយន្តរឿង វាសនាបុប្ផាកម្ពុជាក្រោម ឆ្នាំ១៩៧៤ បានទទួល មរណភាពនៅព្រឹកថ្ងៃទី៩ ខែតុលា ឆ្នាំ២០២៤ ក្នុងជន្មាយុ ៩១ឆ្នាំ ដោយឧបទេវហេតុដួលដាច់សរសៃ ឈាមខួរក្បាលកាលពីព្រលឹមថ្ងៃទី៨ ខែតុលា ឆ្នាំ២០២៤។
សពរបស់លោកតានឹងធ្វើបុណ្យតាមគន្លងប្រពៃណីនៅគេហដ្ឋានរបស់លោក ចៅ ពុទ្ធតារា កូនប្រុសបង្កើតរបស់លោកក្នុងបុរីលឹមឈៀងហាក់ ចម្ការដូង រាជធានីភ្នំពេញ។
បើតាមក្រុមដំណើរខ្មែរលោកព្រឹទ្ធាចារ្យ ចៅ ហ្វា មានស្រុកកំណើតនៅទឹកដីខ្មែរកម្ពុជា បានប្រឡូកក្នុងវិស័យសិល្បៈសៀកតាំងពីដើមទសវត្ស៥០ ដោយមានទេពកោលស្យខ្ពស់ និងប៉ិនប្រសប់ ។
តាំងពីសម័យសង្គមរាស្ត្រនិយម មហាជនខ្មែរស្គាល់ឈ្មោះលោកតាយ៉ាងច្បាស់ដោយធ្លាប់ឃើញលោក តាសម្តែងលើឆាកសិល្បៈនៃពិធីសមាជជាតិ និងពិធីបុណ្យទានផ្សេងៗនៅទូទាំងប្រទេស។ នៅឆ្នាំ១៩៧៤ លោកព្រឹទ្ធាចារ្យ បានកសាងខ្សែភាពយន្តមួយរឿង វាសនាបុប្ផាកម្ពុជា ដោយបានបញ្ចូលឈុតឆាកសៀករហ័សសកម្មដ៏រស់រវើករបស់លោកតាបញ្ចូលក្នុងខ្សែភាពយន្តផងដែរ។
ជាការកត់សម្គាល់នៅមុនទទួលមរណភាពនាពេលនេះស្តេចសៀកជើងចាស់លោក ចៅ ហ្វា បានជួបនូវឧបទ្ទហេតុដួលបាក់ឆ្អឹងជើង ត្រូវបានក្រុមគ្រួសារបញ្ជូនទៅព្យាបាលនៅក្នុងមន្ទីរពេទ្យកាលពីពេលថ្មីៗនេះ ។
លោក ចៅ ហ្វា គឺជាអ្នកសិល្បះផ្នែកសៀករហ័សសកម្មដែលមានភាពល្បីល្បាញតាំងពីឆ្នាំ១៩៦០ រហូតដល់ឆ្នាំ២០០០ ហើយលោកធ្លាប់ទទួលការលើកសសើរពីព្រះមហាក្សត្រ និងថ្នាក់ដឹកនាំជាច្រើនផងដែរ ។
មុនទទួលមរណភាពស្តេចសៀកចៅហ្វា បានរស់នៅក្នុងជីវភាពសមញ្ញមួយក្នុងរាជធានីភ្នំពេញ ដោយមិនបោះបង់ចោលអាជីពសម្តែងសៀករបស់គាត់ទាំងស្រុងទេ ។
លោកធ្លាប់បានបញ្ជាក់ថា លោកចាត់ទុកអាជីពសៀកជាឆ្នាំងបាយយ៉ាងសំខាន់ក្នុងជីវភាពរស់នៅប្រចាំថ្ងៃរបស់គាត់ ប៉ុន្តែមានមូលហេតុខ្លះដែលបណ្តាលឲ្យគាត់ស្ទើរតែលះបង់អាជីពមួយនេះ នោះគឺគ្មានឱកាសសម្តែង ។
ដោយឡែក ក្រៅពីអាជីពសៀក បច្ចុប្បន្នលោក ចៅហ្វា ក៏ជាគ្រូខ្មែរទទួលព្យាបាលជំងឺផ្សេងៗ ប៉ុន្តែដ្បិតជាគ្រូខ្មែរ លោកតែងបដិសេធមិនទទួលការព្យាបាលអ្នកជំងឺណា ដែលមិនទៅពិនិត្យព្យាបាលនៅមន្ទីរពេទ្យជាមុននោះទេ ៕
