ពោធិ៍សាត់៖សេចក្តីរាយការណ៍បានឲ្យដឹងថាបច្ចុប្បន្ននេះ ឈ្មួញឈើដុះស្លែឈ្មោះចែអូននៅតែបន្តរកស៊ី​ដឹកជញ្ជូនឈើ​មូលមកសំបកមិនទានគ្រប់អាយុយ៉ាងកក្រើក ក្នុងខេត្តពោធិសាត់។

ប្រភពខាងលើបានឲ្យដឹងទៀតថា អ្នកកាប់ឈើបាននាំគ្នាចូលកាប់ឈើធ្វើសកម្មភាពតាមមុខសញ្ញារៀងៗខ្លួន ដែលក្នុងនោះគេរាយការណ៍ថា ចែអូន ជាអ្នកដែល​ប្រមូលទិញ ឈើ​បក​សម្បកផ្តាច់មុខនៅចំណុចតាំងយ៉ ភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ ។ នៅលើទឹកដីនេះ គ្មាននរណាហ៊ានទិញ​ឈើ​បកសម្បក ដូច​ចែអូន ទេ សកម្មភាពជំនួញឈើបកសំបករបស់ចែអូនវាហាក់ បីដូចជាទទួលបានសិទ្ធិផ្តាច់មុខក្នុងការទិញឈើ​បកសម្បកនេះយ៉ាងអញ្ជឹង ព្រោះគេសង្កេតឃើញថាពុំមានសមត្ថកិច្ចពាក់ព័ន្ធណាមួយចេញមកទប់ស្កាត់ និងបង្ក្រាបឲ្យមានប្រសិទ្ធិភាពឡើយ។

សេចក្តីរាយការណ៍បានឲ្យដឹងទៀតថា ចែអូន ឈរជើងយ៉ាងរឹងមាំនៅចំណុច​តាំងយ៉ ស្ថិតនៅក្នុងស្រុកវាលវែង ដែលគ្មាននរណា​អាច​រកស៊ីរបរដូចគ្នានៅក្បែរបានឡើយ ។ ប្រភពអះអាងថា នៅលើទឹកដីស្រុក​វាលវែង ជំនួញឈើបកសំបកដែលជាឈើមិនទាន់គ្រប់អាយុត្រូវបានកាប់បំផ្លាញយ៉ាងរង្គាល ហើយមានតែចែអូន​តែម្នាក់ប៉ុណ្ណោះ ដែលជាអ្នកមានសិទ្ធិទិញឈើបកសម្បក ។

តាមប្រភពដដែលបានឲ្យដឹងទៀតថាឈ្មួញឈើល្បីឈ្មោះដុះស្លែ ចែអូន ធ្លាប់ត្រូវបានសមត្ថកិច្ចជំនាញហៅឲ្យទៅធ្វើកិច្ចសន្យា​បញ្ឈប់ការទិញឈើ​បកសម្បកនេះនាពេលកន្លង ទៅ ។ ប៉ុន្តែ​ទោះយ៉ាងណាក្តីកិច្ចសន្យារវាងចែអូន និងសមត្ថ កិច្ចមានតែ​លើ​ក្រដាសប៉ុណ្ណោះគ្មានបានការឡើយ ។

បច្ចុប្បន្ន​នេះក្នុងខេត្តពោធិសាត់ សមត្ថកិច្ច​បានរិតបន្តឹងចំពោះ​ចំពោះការដឹកជញ្ជូនឈើគ្រប់ប្រភេទយ៉ាងណក៏ដោយ គេនៅសង្កេតឃើញចែអូននៅតែអាចដឹកឈើចេញពីស្រុកវាលវែង​ឆ្ពោះទៅរាជធានីភ្នំពេញជារៀងរាល់យប់បានដោយរលូនខណៈប្រភពបានឲ្យដឹងថា ចែអូន បានរៀបចំរត់ការជាប្រព័ន្ធអស់ហើយ ដោយបង់លុយឲ្យសមត្ថកិច្ចពាក់ព័ន្ធដែលឈរជើងតាមគោលដៅ និងដងផ្លូវគ្រប់កន្លែងអស់ហើយ ។

មហាជនដែលដឹងរឿងនិងតសមដានដំណើររកស៊ីដឹកជញ្ជូន ឈើខុសច្បាប់របស់ចែអូនបានលើកឡើងថាសកម្មភាបជំនួញ ឈើយ៉ាងរលូនរបស់ចែអូន ជោគជ័យមួយនៃរបររកស៊ីរបស់ ហើយវា​ក៏ជាមោទនភាព​នៃក្រុមមន្ត្រីមួយចំនួនក្នុងខេត្ត ពោធិ៍សាត់ ដែលអាចកាង​ឲ្យចែអូនបន្តរបររកស៊ីដឹកជញ្ជូនឈើ​បកសម្បកបានដោយសេរី ទាំងយប់ ទាំងថ្ងៃ ដូចសព្វថ្ងៃនេះ ។

ប្រភពពីអ្នកកាប់ឈើលក់ឲ្យចែអូន បានឲ្យដឹងថា ចែអូនបានដើរនិយាយអះអាងថាការត្រូវជាមួយសមត្ថកិច្ចជាប្រព័ន្ធដោយប្រើ វប្បធម៌ចែករំលែកផលលាភឲ្យគ្នាទើបធ្វើឲ្យគាត់អាច​ឈរជើងលើសមរភូមិឈើបកសម្បកនេះបានដល់សព្វថ្ងៃ ដំណើរការយ៉ាងរលូន។

ប្រជាពលរដ្ឋដែលស្រឡាញ់ធនធានធម្មជាតិព្រៃឈើសំណូម ពរដល់អាជ្ញាធរខេត្តពោធិ៍សាត់ក៍ដូចជាមន្ត្រីជំនាញ និងសមត្ថ កិច្ចពាក់ព័ន្ធមេត្តាចាត់វិធានការឲ្យបានតឹងរ៉ឹងបំផុត ទប់ស្កាត់ និងបង្ក្រាបសកម្មភាពដឹកជញ្ជូនឈើបកសម្បកមិនទាន់គ្រប់អាយុ របស់ចែអូន អោយមានប្រសិទ្ធិភាព ។

ពាក់ព័ន្ធនិងប្រភពព័ត៌មានខាងលើនេះ គេហទំព័រ រស្មីនគររាជ មិនអាចសុំការបកស្រាយណាមួយពីចែអូន ក៍ដូចជាមន្ត្រីសមត្ថកិច្ចពាក់ព័ន្ធបាននៅឡើយទេ៕